بتتكلموا جد ؟؟؟
--------------------------------------------------------------------------------
فيه استيكر انتشر بسرعه بعد موضوع الكاريكتير الدنماركي ال هو كلنا فداك يا رسول الله حاجه تفرح القلب بجد ....
ملزوق على العربيات الاستيكر ده جميل برده روح القوه دي والحب يا سلام هو احنا في ده اليوم لما نلاقي العرب المسلمين محموقين على قضيه .
طيب ايوه يعني اعمل ايه ...جميل قوي الاستيكر بس عملتوا ايه يعني ...
لقطات للأشخاص ال سايقين العربيات دي ...
واحد يبقى ماشي بسرعه وراكبه ميت عفريت ويفضل يقلب في نور عشان اوسعله الطريق رغم ان مفيش مجال اني انزل اي حاره جمبي وان نزلت يفضل ينور في العربيه ال كانت قدامي وهكذا لحد ما يفضى له الطريق ... يعني ممكن حد يعمل حادثه ...بسببه ...
وكلنا فداك ...اخلاق صراحه ..
غيره لو شباك عربيتي مش مقفول كان زماني لقيت دماغه في عربيتي مؤدب جدا ...كلنا فداك يا رسول الله ...
وامور تاني معاه الموبيل ويمسكه في ايده ويشاور بارقام عشان ارد عليه وبرده كلنا فداك يا رسول الله ...
طيب يا معشر كلنا فداك يا رسول الله وبالعربيه ال عليها الاستيكر ده لافف وداير ودماغك مش معاك ما هيا تايههه في عالم تاني له علاقه بكل ما حرمه
الرسول عليه الصلاة والسلام .... وكلنا فداك يا رسول الله ....
طيب يا عرب يا مسلمين ... اي فداء بتتكلموا عنه ...
تقعدوا في جلسه تحاوريه وناس تقولك شوف اليهود عملوا ايه والامريكان قالوا ايه دول اقنعوا الدنيا بافكارهم ازاي واحنا المسلمين دين الحق ازاي ده يحصلنا وحسبي الله ونعم الوكيل ...
صراحه لازم نتحمق على دينا ونتضايق وبعد الحمقه دي تعالوا نمسك في سيرة العالم ونغتاب ده ونمن على ده ... مش محموقين على دينا . ..وكلنا فداك يا رسول الله ..
تعالوا نفكر في الصدقه والزكاه بس بشرط لما نتصدق لازم الاعلام يصورنا عشان الناس تقول علينا احنا ناس بتوع كرم ولا الزكاه لازم نزل الناس ونوقفها طوابير عشان الناس التانيه تشوفهم ويقولوا عليه رجل بر وثواب ...
ما هو احنا بنتبع دينا الحنيف اهو مش كلنا فداك يا رسول الله ....
وانتي يا حلوه يا ال ما سيبتيش حته في جسمك ال ما كشفتيها بس صراحه محترمه جدا اصل السلسه ال في رقبتك مكتوب عليها كلنا فداك يا رسول الله ...
وانتا صاحب القنوات الفضائيه الاعلاميه يا ال بتطلع لينا اعلام عشان تطورنا وتهنينا ونبسط معاك اصلك بتحب تتبع المقوله ادخل السرور على قلب اخيك المؤمن .... وصدقت يا اخي ما انتا سمعت كلام الرسول اهو وصراحه اتحمقت جدا على ال حصل وبيحصل للمسلمين وفتحت للمسلمين شريط رسايل والكل داخل يقول يا ويلهم وحسبي الله ونعم الوكيل ويارب ويارب وفوق الشريط الاعلاني ال انتا كرمتنا بيه اغاني لمسلمين بشرط العري مطلوب والاباحه هي رمز الفن الاسلامي العريق ... وصراحه كان لازم ابعت ساعتها كلنا فداك يا رسول الله مشاركه وجدانيه وعشان نقول للعالم اننا صاحين مش نايمين ... صراحه اعلامنا بنستفاد منه وبنوصل فكرنا بطريقه ما لهاش حل ..
وانتا يا اخويا يا كاره كل من هم على غير ملتك صراحه اديت صوره كويسه جدا للإسلام مش انتا يا صاحب الكلمات الدينيه وقال الله وقال الرسول جالك واحد على غير دينك وما ردتش تسلم عليه عشان هو كافر واشمئزيت منه ... وبعد ما كان ناوي يسلم طلع من عندك وقال صدق من قال عليكم دين الارهاب ... وصراحه انتا ما نسيتش وهو طالع تطلع تقول كلنا فداك يا رسول الله ....
كلنا فداك يا رسول الله .
الرئيسية 
الأحد يونيو 24, 2007 3:22 am